𝐄𝐱𝐜𝐥𝐮𝐬𝐢𝐯𝐞: ஜனாதிபதியின் பதவிக்கால மனு: வழக்கில் நடந்தது என்ன? (முழு விபரம் )

(UTV செய்தியாளர்) ஜனாதிபதியின் பதவிக்காலம் நிறைவடையும் தினம் தொடர்பில் நீதிமன்றத்தினால் வியாக்கியாண‌ம் வழங்கப்படும் வரை தற்போது திட்டமிடப்பட்டுள்ள வகையில் ஜனாதிபதி தேர்தல் நடத்தப்படுவதை தடுக்கும் உத்தர​வை பிறப்பிக்குமாறு கோரி தாக்கல் செய்யப்பட்ட அடிப்படை உரிமை மீறல் மனுவை விசாரணைக்கு ஏற்காது தள்ளுபடி செய்ய உயர் நீதிமன்றம் இன்று ( 8) உத்தரவிட்டது. அத்துடன் இந்த மனுவை தாக்கல் செய்த தொழில்முயற்சியாளர் சி.டி. லெனவ வழக்குக் கட்டணமாக ஒரு இலட்சம் ரூபாவை செலுத்த வேண்டும் எனவும் உயர் நீதிமன்றம் உத்தரவிட்டது. அதனை ஒரு மாதத்துக்குள் நீதிமன்றில் வைப்பிட வேண்டும் எனவும் கட்டளை இட்டது. பிரதம நீதியரசர் ஜனாதிபதி சட்டத்தரணி ஜயந்த ஜயசூரிய தலைமையில் நீதியரசர்களான விஜித் மலல்கொட, முர்து பெர்ணான்டொ, ப்ரீத்தி பத்மன் சுரசேன மற்றும் எஸ். துறைராஜா ஆகியோர் அடங்கிய ஐவர் கொண்ட பூரண நீதியரசர்கள் குழாம் மனுவை பரிசீலித்து மேற்படி கட்டளையை பிறப்பித்தது.

அரசியலமைப்பின் 19 ஆவது திருத்தச் சட்டம் பிரகாரம், ஜனாதிபதியின் பதவிக் காலம் தொடர்பில் உயர் நீதிமன்றம் வியாக்கியாணம் ஒன்றினை வழங்க வேண்டும் எனவும் அவ்வாறு வியாக்கியாணம் ஒன்று இல்லாமல் ஜனாதிபதித் தேர்தலை நடாத்துவது மக்களின் அடிப்படை உரிமையை மீறும் செயல் என குறிப்பிட்டு சி.டி. லெனவ அடிப்படை உரிமை மீறல் மனுவை தாக்கல் செய்துள்ளார். அதனால் உயர் நீதிமன்றம் வியாக்கியாணம் வழங்கும் வரை, திட்டமிடப்பட்டுள்ள ஜனாதிபதித் தேர்தலை நடாத்த இடைக்கால தடை விதிக்குமாறு மனுதாரர் இந்த மனு ஊடாக கோரியிருந்தார். மனுவின் பிரதிவாதிகளாக தேர்தல்கள் ஆணைக் குழு, அவ்வாணைக் குழுவின் தலைவர் உள்ளிட்ட உறுப்பினர்கள் மற்றும் சட்ட மா அதிபர் ஆகியோர் பெயரிடப்பட்டுள்ளனர்.

அரசியலமைப்பின் 19வது திருத்தச் சட்டத்தில் ஜனாதிபதியின் பதவிக்காலம் தொடர்பான திருத்தம் காரணமாக, ஜனாதிபதியின் பதவிக்காலம் முடிவடையும் திகதி தொடர்பில் தெளிவின்மை ஏற்பட்டுள்ளதாக மனுதாரர் தனது மனுவில் குறிப்பிட்டிருந்தார்.

இந் நிலையில், இந்த அடிப்படை உரிமை மீறல் மனு இன்று மு.ப. 10. 30 மணியளவியில் உயர் நீதிமன்றில் 502 ஆம் இலக்க அறையில் பரிசீலனைக்கு எடுத்துக்கொள்ளப்பட்டது. பிரதம நீதியரசர் ஜயந்த ஜயசூரிய தலைமையிலான நீதியரசர்கள் குழாம் வழக்கை பரிசீலிக்க தயான போது, இடையீட்டு மனுதாரர்களின் சட்டத்தரணிகள், இந்த மனு தொடர்பில் தாம் இடையீடு செய்ய செய்ய எதிர்ப்பார்ப்பதாக குறிப்பிட்டனர். அத்துடன் சட்ட மா அதிபர் உள்ளிட்ட பிரதிவாதிகளுக்காக ஆஜரான பிரதி சொல்சிட்டர் ஜெனரால் கனிஷ்கா டி சில்வா ஆஜராகி அடிப்படை ஆட்சேபனம் முன் வைக்க அனுமதி கோரினார். இதன்போது மனுதாரரே தனக்கான வாதங்களை முன் வைத்தார்.

இந் நிலையில் முதலில் அடிப்படை ஆட்சேபனங்களை முன் வைத்த‌ பிரதிவாதிகள் சார்பில் ஆஜரான சட்ட மா அதிபர் திணைக்களத்தின் பிரதி சொலிசிட்டர் ஜெனரால் கனிஷ்கா டி சில்வா, ஜனாதிபதி பதவிக் காலம் 5 வருடங்கள் என்பதே சட்ட மா அதிபரின் நிலைப்பாடு என மன்றில் தெரிவித்தார்.
‘ மனுவை பரிசீலிக்கும் போது, மனுவில் குறிப்பிடப்பட்டுள்ள விடயங்கள் அடிப்படை உரிமையை மீறுவதாக வெளிப்படையாக தெரியவில்லை. அரசியலமைப்பின் 126 ஆவது உறுப்புரை பிரகாரம் அடிப்படை உரிமை மீறல் மனுவாக இதனை கருத்தில் கொள்ள முடியாது.
அதே நேரம் மனுதாரர் கூறுவதைப் போல இந்த மனு அரசியலமைப்பின் 82 ஆம் உறுப்புரை மற்றும் அதனை சார்ந்தத சரத்துக்களின் அதிகார வரப்பினை பயன்படுத்த முயற்சித்தாலும் அதற்குள் உள்ளடக்க முடியாது. உரிய நடைமுறைகளை பின்பற்றி முன் வைக்கப்பட்ட மனுவல்ல. எனவே இதனை விசாரணைக்கு ஏற்காது நிராகரிக்க வேண்டும்.
அத்துடன் 19 ஆவது திருத்தச் சட்டம் என்பது தற்போது நாட்டின் அரசியலமைப்பு சட்டமாக உள்ளது. அவ்வாறான நிலையில் நிறைவேற்றப்பட்ட சட்டம் ஒன்று தொடர்பில் மீள் பரிசீலனை செய்ய இந்த நீதிமன்றால் முடியாது. எனவே இந்த மனுவை முன் கொண்டு செல்ல முடியாது. எனவே இதனை தள்ளுபடி செய்து உத்தரவிட வேண்டும்.’ என பிரதி சொலிசிட்டர் ஜெனரால் கனிஷ்கா டி சில்வா கோரினார்.

இடையீட்டு மனுதாரர்களின் ஆட்சேபனங்கள் :

இதனையடுத்து இடையீட்டு மனுதாரர்களுக்கு தமது ஆட்சேபங்களை முன் வைக்க சந்தர்ப்பம் அளிக்கப்பட்டது. முதலில் சிரேஷ்ட ஜனாதிபதி சட்டத்தரணி ரொமேஷ் டி சில்வா, ஜனாதிபதி சட்டத்தரணி பர்மான் காசிமுடன் ஆஜராகி, இடையீட்டு மனுதாரரான ஐக்கிய மக்கள் சக்தி பொதுச் செயலாளர் ரஞ்சித் மத்தும பண்டார சார்பில் வாதங்களை முன் வைத்தார். இந்த மனுவை விசாரிக்க உயர் நீதிமன்றத்துக்கு எந்த அதிகாரமும் இல்லை. அரசியலமைப்பின் 82 ( 6) ஆம் உறுப்புரை மிகத் தெளிவாக உள்ளது. 19 ஆவது அரசியலமைப்பு திருத்தச் சட்டம் தற்போது நிறைவேற்ற‌ப்பட்டுவிட்டது. அது சரியோ தவறோ முடிந்த விடயம். அதனை சவாலுக்கு உட்படுத்த எந்த வழிமுறையும் உயர் நீதிமன்றுக்கு இல்லை. எனவே இம்மனுவை விசாரிக்க முடியாது. எனவே இதனை தள்ளுபடி செய்ய வேண்டும்.’ என ஜனாதிபதி சட்டத்தரணி ரொமேஷ் டி சில்வா கோரினார்.

இலங்கை சட்டத்தரனிகள் சங்கம் சார்பில் ஆஜரான ஜனாதிபதி சட்டத்தரணி கலாநிதி கனக ஈஸ்வரன் வாதங்களை முன் வைக்கையில் ‘ மனுவை முன்னெடுத்து செல்ல முடியுமான சட்ட வலு இல்லை. நிறைவேற்றப்பட்ட சட்டம் ஒன்றினை சவாலுக்கு உட்படுத்த முடியாது. எனவே இம்மனுவை தள்ளுபடி செய்ய வேண்டும்.’ என வாதிட்டார்.

ஜனாதிபதி சட்டத்தரணி நைஜல் ஹெட்ஜ், ஜனாதிபதி சட்டத்தரணி சாலிய பீரிஸும் சிற‌ப்பு விடயம் ஒன்றினை மன்றில் வெளிப்ப‌டுத்தினர். அதாவது, ‘இந்த அடிப்படை உரிமை மீறல் மனுவை தாக்கல் செய்துள்ள மனுதாரர் கடந்த 2019 ஆம் ஆண்டும் உயர் நீதிமன்றில் எழுத்தாணை மனுவொன்றினை தாக்கல் செய்துள்ளார். அப்போது நடக்க இருந்த ஜனாதிபதித் தேர்தலை தடுக்கக் கோரி அவர் அம்மனுவை தாக்கல்ச் செய்திருந்தார். இதே விடயங்களையே அப்போதும் அவர் முன் வைத்திருந்தார். மனுதாரர், அரசியலமைப்பில் இல்லாத சிக்கல்களை உருவாக்கி நீதிமன்றத்தை தவறாக வழிநடத்தும் வகையில் இந்த மனு தாக்கல் செய்யப்பட்டுள்ளதாகவும் ஜனாதிபதி சட்டத்தரணிகள் மன்றில் சுட்டிக்காட்டினர். இந்த செயற்பாட்டினால் மனுதாரர் நீதிமன்றத்தின் அதிகாரத்தை தவறாக பயன்படுத்தியுள்ளதாகவும் ஜனாதிபதி சட்டத்தரணிகள் மன்றில் குறிப்பிட்டனர். இதனால், மனுதாரர் தமது மனுவில் குறிப்பிட்டவாறு அவரின் அடிப்படை உரிமைகள் மீறப்படவில்லை என சுட்டிக்காட்டிய சட்டத்தரணிகள், மனுவை விசாரணையின்றி தள்ளுபடி செய்யுமாறு மன்றில் கோரிக்கை விடுத்தனர்.

2019 இல் தாக்கல் செய்த எழுத்தாணை மனு ஜனாதிபதித் தேர்தலை தடுக்கும் நோக்கில் தாக்கல் செய்யப்படவில்லை என மனுதாரர் அவர் குறிப்பிட்டார். அத்துடன் அம்மனுவை விசாரித்த நீதியரசர்களில் ஒருவரான பிரசன்ன ஜயவர்தன ( தற்போது காலம் சென்றுவிட்டார் ) அம்மனுவை தாக்கல் செய்தமைக்காக தன்னை பாராட்டியதாகவும் மனுதாரர் குறிப்பிட்டார்.

நீதியரசர்கள் குழாமின் நீதியரசர் எஸ். துறை ராஜா ஒரு கட்டத்தில் 2019 இல் தாக்கல் செய்யப்பட்ட எழுத்தாணை மனு தொடர்பில் ‘என்னிடம் மூல ஆவணம் இருக்கின்றது… நீதியரசர் பிரசன்ன ஜயவர்தன ஒரு போதும் உங்களை பாராட்டவில்லை… மாறாக அவர் உங்களை எச்சரித்தார்… என சுட்டிக்காட்டினார்.

தொடர்ந்து பிரதம நீதியரசர் ஜயந்த ஜயசூரிய, மனுதாரரின் நிலைப்பாடு, மனுவை உயர் நீதிமன்ற‌ம் விசாரிக்க உள்ள அதிகாரம் தொடர்பில் வினவினார். அதற்கு அடிப்படை உரிமை மீறல் மனுவாக உயர் நீதிமன்ற‌த்துக்கு மனுவை விசாரிக்க முடியும் என தெரிவித்த மனுதாரரிடம், எவ்வகையான அடிப்படை உரிமை மீறப்பட்டுள்ள‌து என பிரதம நீதியரசர் மீள வினவினார்.
சட்ட விரோதமாக ஜனாதிபதித் தேர்தல் நடாத்தப்படுவதன் ஊடாக தனதும் மக்களினதும் இறையாண்மை மீறப்ப‌டுவதாக மனுதாரர் இதன்போது குறிப்பிட்டார்.

இதன்போது பிரதம நீதியரசர் ஜயந்த ஜயசூரிய, 19 ஆவது அரசியலமைப்பு திருத்தம் தொடர்பில் உயர் நீதிமன்ற‌ம் அப்போது வழங்கிய வியாக்கியாணம் தொடர்பில் அறிந்துள்ளீரா என வினவினார். அதற்கு மனுதாரர் ஆம் என பதிலளித்தார். அதன் பிரதி கைவசம் உள்ளதா என பிரதம நீதியரசர் மனுதாரரை வினவ, பிரதி கைவசம் இல்லை எனவும், எனினும் அதனை தான் அறிவதாகவும் குறிப்பிட்டார். இதன்போது, திறந்த மன்றில் முக்கிய விடயத்தை குறிப்பிட்ட நீதியரசர் ஜயந்த ஜயசூரிய, அரசியலமைப்பின் 19 ஆவது திருத்தம் தொடர்பில் உயர் நீதிமன்றம் அளித்த வியாக்கியாணத்தில், 3 ஆம் அத்தியாயத்தை நிறைவேற்ற சர்வஜன வாக்கெடுப்பு அவசியம் என குறிப்பிடப்படவில்லை என சுட்டிக்காட்டினார்.

இந் நிலையில் மனு மீதான பரிசீலனைகளை பிற்பகல் 12.10 மணிக்கு நிறைவு செய்த நீதிமன்ரம், தனது தீர்மானத்தை அறிவிக்க கால அவகாசம் எடுத்துக்கொண்டு மனுவை பி.ப. 12.30 மணி வரை ஒத்தி வைத்தது. எனினும் மனுவானது மீள பி.ப. 1.04 மணிக்கு தீர்மானத்தை அறிவிக்க பரிசீலனைக்கு வந்தது. இதன்போது பிரதம நீதியரசர் ஜயந்த ஜயசூரிய ஐவர் கொண்ட நீதியரசர்கள் குழாமின் ஏகமனதான முடிவாக தீர்மானத்தை அறிவித்தார்.

‘ 2019 ஆம் ஆண்டிலும் இந்த விடயத்தின் அடிப்படையில் எழுத்தாணை மனு தாக்கல் செய்யப்பட்டுள்ளது. அதே காரணிகளின் அடிப்படையிலேயே இந்த மனுவும் தாக்கல் செய்யப்பட்டுள்ளது. இதனால் இந்த மனு மீதான விசாரணையை முன்கொண்டு செல்ல போதுமான காரணிகள் இல்லை. அதனால் இம்மனுவை தள்ளுபடி செய்ய இம்மன்று உத்தரவிடுகின்றது. ‘என நீதியரசர் ஜயந்த ஜயசூரிய தீர்ப்பை அறிவித்தார்.  UTV செய்தியாளர்