(UTV | கொழும்பு) – எதிர்வரும் 6 மாதங்கள் மிகவும் கடினமான காலப்பகுதியாக இருக்கும் எனவும், இது நாம் ஒருபோதும் அனுபவித்திராத காலமாக இருக்கும் எனவும் ஜனாதிபதி ரணில் விக்கிரமசிங்க தெரிவித்துள்ளார்.
சட்டத்தரணி நிறுவகத்தினால் தொகுக்கப்பட்ட பொருளாதார சீர்திருத்தங்கள் தொடர்பான ஆய்வு அறிக்கையை வெளியிடும் நிகழ்வில் கலந்து கொண்டு உரையாற்றும் போதே ஜனாதிபதி மேற்கண்டவாறு தெரிவித்தார்.
இலங்கை தற்போது எதிர்நோக்கி வரும் பொருளாதார நெருக்கடியில் இருந்து மீள வேண்டுமாயின் சர்வதேச நாணய நிதியத்துடன் உடன்படிக்கைக்கு வரவேண்டும் என ஜனாதிபதி சுட்டிக்காட்டினார்.
அங்கு உரையாற்றிய ஜனாதிபதி ரணில் விக்கிரமசிங்க,
“சர்வதேச நாணய நிதியத்துடன் ஊழியர்கள் அளவிலான ஒப்பந்தத்தை எட்டுவதைத் தவிர, இந்த சூழ்நிலையிலிருந்து வெளியேற வேறு எந்த தீர்வும் எங்களிடம் இல்லை என்று நான் நினைக்கிறேன். நாம் விரும்பினாலும் விரும்பாவிட்டாலும் சர்வதேச நாணய நிதியத்துடன் ஒப்பந்தம் செய்து கொள்ள வேண்டும். அது நல்லதா கெட்டதா என்பதை நீங்கள்தான் தீர்மானிக்க வேண்டும்.
முதலில் ஊழியர்கள் மட்டத்தில் ஒருமித்த கருத்துக்கு வர வேண்டும். ஆனால், நாடாளுமன்றத்தில் உள்ள அனைவரும் இதில் கவனம் செலுத்த வேண்டும். எந்த ஒரு நாடாளுமன்ற உறுப்பினரும், கட்சியும் அதற்கு உடன்படவில்லை என்றால் உங்களின் தீர்வு என்ன என்று கேள்வி கேட்க எங்களுக்கு உரிமை உள்ளது. அல்லது உங்கள் மாற்று தீர்வு என்ன. இதற்கு அனைத்து தரப்பினரும் உடன்பட வேண்டும். சர்வதேச நாணய நிதியத்துடனான பேச்சுவார்த்தைகளில் நாம் எதிர்கொள்ள வேண்டிய முக்கிய பிரச்சினை, அரசாங்கங்கள் மாறும்போது கொள்கைகள் மாறுவதுதான்.
அதற்கு நாம் தயாரா என்பதை சிந்திக்க வேண்டும். அதை நாடாளுமன்றம் நிராகரித்தால் அதன் விளைவுகளை சந்திக்க வேண்டியிருக்கும். இதன் மூலம் பொருளாதாரத்தை மீட்டெடுக்க முடியும். ஆனால் எதிர்காலத்தில் கண்டிப்பாக கடினமாக இருக்கலாம். நான் அதை மறுக்கவில்லை. முதல் 6 மாதங்கள் மிகவும் கடினம். இது நாம் அனுபவித்திராத நேரம், ஆனால் நாம் அதை கடந்து செல்ல வேண்டும். நாங்கள் திரும்பிச் செல்ல முடியாது.
பழைய பொருளாதாரக் கொள்கைகளின் விளைவுதான் இன்று நாம் அனுபவித்துக் கொண்டிருக்கிறோம். எனவே நாம் மீண்டும் அந்த அமைப்புக்கு செல்வதில் அர்த்தமில்லை. புதிதாக சிந்திப்போம்.”