(UTV | கொழும்பு) – செப்டம்பர் முதல் வாரத்தில் இடைக்கால வரவு செலவுத் திட்டத்தை சமர்ப்பிக்கத் திட்டமிட்டுள்ளதாக ஜனாதிபதி ரணில் விக்கிரமசிங்க அறிவித்துள்ளார்.
இடைக்கால வரவு செலவுத் திட்டத்தின் மூலம் மக்களுக்கு பல சலுகைகளையும் நிவாரணங்களையும் வழங்குவதாக ஜனாதிபதி விக்கிரமசிங்க தெரிவித்துள்ளார்.
சர்வகட்சி அரசாங்கத்தை அமைப்பது தொடர்பில் நாடாளுமன்ற உறுப்பினர்கள் குழுவுடன் நேற்று மாலை இடம்பெற்ற கலந்துரையாடலின் போதே ஜனாதிபதி இந்த விடயத்தை தெரிவித்தார்.
ஸ்ரீலங்கா சுதந்திரக் கட்சியின் பிரதிநிதிகள் மற்றும் நாடாளுமன்ற உறுப்பினர்களான ஜி.எல்.பீரிஸ் மற்றும் டலஸ் அழகப்பெரும உள்ளிட்ட மற்றுமொரு குழுவை ஜனாதிபதி சந்தித்துள்ளார்.
முழு பாராளுமன்றத்தையும் அரசாங்கமாக மாற்றி நாட்டை கட்டியெழுப்புவதே சர்வகட்சி அரசாங்கத்தின் நோக்கமாகும் என ஜனாதிபதி தெரிவித்துள்ளார்.
அரசியலமைப்பின் 22 ஆவது திருத்தம் ஏற்கனவே வர்த்தமானியில் வெளியிடப்பட்டுள்ளதாகவும், அதனை அங்கீகரிப்பதற்காக நாடாளுமன்றத்தில் உள்ள அனைத்து தரப்பினரின் ஆதரவை எதிர்பார்ப்பதாகவும் ஜனாதிபதி விக்கிரமசிங்க குறிப்பிட்டுள்ளார்.
தற்போதைய பொருளாதார நெருக்கடியிலிருந்து நாட்டைக் காப்பாற்றுவதற்கான பொதுவான உடன்படிக்கைக்கு இணக்கம் காணப்பட வேண்டியதன் அவசியத்தை ஜனாதிபதி ரணில் விக்கிரமசிங்க இந்த சந்திப்பின் போது வலியுறுத்தியுள்ளார்.
வாராந்த அமைச்சரவைக் கூட்டங்களுக்கு துறைசார் மேற்பார்வைக் குழுக்களின் தலைவர்களை அழைக்கத் தயார் எனவும் ஜனாதிபதி சுட்டிக்காட்டியுள்ளார்.
இதேவேளை, சர்வகட்சி அரசாங்கத்தை அமைப்பதற்கு தமது கட்சி பூரண ஆதரவை வழங்கும் என ஸ்ரீலங்கா சுதந்திரக் கட்சியின் தலைவர் முன்னாள் ஜனாதிபதி மைத்திரிபால சிறிசேன தெரிவித்துள்ளார்.
சர்வகட்சி அரசாங்கத்தை அமைப்பது தொடர்பில் ஸ்ரீலங்கா சுதந்திரக் கட்சி 11 அம்ச முன்மொழிவுகளையும் முன்வைத்தது.
இதேவேளை, நாடாளுமன்ற உறுப்பினர்களான ஜி.எல்., டலஸ் அழகப்பெரும மற்றும் அவர்களது குழுவினருடனான சந்திப்பின் போது, 10 வருடங்களுக்கு நாட்டிற்கு பொருத்தமான பொருளாதார வேலைத்திட்டத்தை உருவாக்குவதற்கு அனைத்து தரப்புகளும் பங்களிக்க வேண்டுமென ஜனாதிபதி விக்கிரமசிங்க தெரிவித்துள்ளார்.
அனைத்து அரசியல் குழுக்களும் பேச்சுவார்த்தைகளை நடத்தி கடுமையான சர்வகட்சி அரசாங்கத்தை விரைவில் அமைக்க தயாராக இருக்க வேண்டும் என பாராளுமன்ற உறுப்பினர் அழகப்பெரும தெரிவித்துள்ளார்.
இதேவேளை, ஜனாதிபதி ரணில் விக்கிரமசிங்க எதிர்வரும் சில தினங்களில் இவ்விடயம் தொடர்பில் மேலும் பல தரப்பினரையும் சந்திக்கவுள்ளார்.