(UTV | கொழும்பு) – முதலீட்டு திட்டங்களுக்கு ஒரு நாளுக்குள் அனுமதி வழங்கும் வேலைத்திட்டம் அறிமுகப்படுத்தப்படும் என முதலீட்டு ஊக்குவிப்பு அமைச்சர் தம்மிக்க பெரேரா தெரிவித்துள்ளார்.
முதலீட்டு ஊக்குவிப்பு அமைச்சராக பதவிப் பிரமாணம் செய்து கொண்ட பின்னர் ஊடகங்களிடம் பேசிய தம்மிக பெரேரா, முதலீட்டு திட்டங்களுக்கான அனுமதிக்கு தற்போது இரண்டு முதல் மூன்று மாதங்கள் தேவைப்படுவதாகவும், செயல்முறையை துரிதப்படுத்துவதாகவும் உறுதியளித்தார்.
முதலீடுகளை ஈர்க்க முடியும் என தாம் நம்புவதாகத் தெரிவித்த அமைச்சர் பெரேரா, மோதலின் போது முதலீடுகளை கொண்டு வந்ததால் அது தனக்கு பெரிய சவாலாக இல்லை என்றும் கூறினார்.
தாம் அரசாங்கத்தில் இணைந்து கொண்டதாகவும், திட்டங்களை நடைமுறைப்படுத்துவதற்கும் எதிர்காலத்திற்கான வரைபடத்தை முன்வைப்பதற்கும் இரண்டு வாரங்களுக்கு அழைப்பு விடுத்துள்ளதாக அமைச்சர் கூறினார்.
குறிப்பாக மாத்தறை, கண்டி மற்றும் நுவரெலியா ஆகிய இடங்களில் கடவுச்சீட்டுகளை ஒரு நாளுக்குள் வழங்குவதற்கு நடவடிக்கை எடுப்பதாக தெரிவித்த அமைச்சர், ஒரு வாரத்திற்குள் நெரிசலை குறைப்பதாக உறுதியளித்தார்.
ஊடகவியலாளர்கள் தம்மை மீண்டும் ஒருமுறை நேர்காணல் செய்யுமாறும், ஏதேனும் குறைபாடுகளை அவர் நிவர்த்தி செய்யத் தவறினால் குறித்த பகுதிகளில் கேள்விகளை எழுப்புமாறும் அவர் கேட்டுக் கொண்டார்.
எந்தவொரு விடயத்திற்கும் தலைமைப் பொறுப்பில் இருப்பவர்களிடம் இருந்து வழிகாட்டுதல் வழங்கப்பட வேண்டும் என்றும், இந்த இக்கட்டான நேரத்தில் அனைத்துத் தரப்பினரும் ஒன்றிணைந்து செயற்படுமாறும் அமைச்சர் பெரேரா மேலும் தெரிவித்தார்.
இதுபோன்ற கடினமான தருணத்தில் நாட்டுக்கு ஆதரவளிக்க முன்வருவது மிகவும் முக்கியமானதாக இருந்ததால், தனது தொழில்களை விட்டுச் சென்றதாகக் கூறி, வாய்மொழித் திட்டங்களை அல்ல, எழுத்துமூலமான திட்டங்களையே சமர்ப்பிப்பதாகவும் அமைச்சர் பெரேரா கூறினார்.
எதிர்க்கட்சிகளுடன் முரண்பட்டு தீர்வு காண முடியாது என தெரிவித்த அவர், கலந்துரையாடல்களின் பின்னர் எதிர்க்கட்சித் தலைவரின் ஆதரவைப் பெற முடியும் என நம்புவதாகவும் தெரிவித்தார்.