(UTV | கொழும்பு) – அகில இலங்கை மக்கள் காங்கிரஸ் (ACMC) தலைவர் மற்றும் வன்னி மாவட்ட பாராளுமன்ற உறுப்பினர் ரிஷாத் பதியுதீன் நீண்டகாலமாக கைது செய்யப்பட்டு தடுத்து வைக்கப்பட்டுள்ளமை தொடர்பில் முன்னாள் பிரதமர் ரணில் விக்கிரமசிங்க மற்றும் எதிர்க்கட்சியின் பாராளுமன்ற உறுப்பினர் லக்ஷ்மன் கிரியெல்ல ஆகியோரால் நாடாளுமன்றத்தில் நேற்று(04) கேள்விகள் எழுப்பப்பட்டன.
உயிர்த்த ஞாயிறு தாக்குதலுடன் தொடர்புடையதாகக் கூறி நாடாளுமன்ற உறுப்பினர் ரிஷாத் பதியுதீன் அவரது வீட்டில் இருந்து அநீதியான முறையில் கைது செய்யப்பட்டு 164 நாட்கள் ஆகிவிட்டன. எவ்வாறாயினும், இன்று வரை எந்தக் குற்றச்சாட்டும் சுமத்தப்படவில்லை மற்றும் அவரது குற்றத்தைக் குறிக்கும் எந்த ஆதாரமும் வெளிவரவில்லை.
முன்னாள் பிரதமர் ரணில் விக்கிரமசிங்க பாராளுமன்றத்தில் இது தொடர்பில் உரையாற்றுகையில்;
உயிர்த்த ஞாயிறு தாக்குதலில் ஈடுபட்டதாக கூறப்படும் ஒவ்வொரு நபருக்கும் எதிராக குற்றச்சாட்டுகள் பதிவு செய்யப்பட்டுள்ளதாகவும் ஆனால் பதியுதீனுக்கு எதிராக எந்த குற்றச்சாட்டும் சுமத்தப்படவில்லை என்றும் கூறினார்.
பதியுதீன் ஒரு பாராளுமன்ற உறுப்பினராக இருந்ததால், அது ஒரு பாராளுமன்ற விவகாரம் என்றும், இந்த வழக்கு தொடர்பான விவரங்கள் மற்றும் சான்றுகள் பாராளுமன்றத்துடன் முன்கூட்டியே பகிரப்பட வேண்டும் என்றும் அவர் கூறினார். மேலும், உயிர்த்த ஞாயிறு தாக்குதல் குறித்த அறிக்கையின் ஒரு பகுதி பாராளுமன்றத்தில் முன்வைக்கப்படாது மறைத்து வைக்கப்பட்டுள்ளதாகவும், இந்த வழக்கில் நாடாளுமன்றம் சிறந்த தீர்ப்பை வழங்குவதற்காக அதை வெளியிட வேண்டும் என்றும் அவர் கூறினார்.
விசாரணையில் ஈடுபட்டுள்ள அதிகாரிகள் விடாமுயற்சியுடனும் பொறுப்புடனும் பணியாற்றி நெருக்கடி நிலைமையைக் கட்டுப்படுத்த உதவியதாகவும் விக்கிரமசிங்க இதன்போது ஒப்புக்கொண்டார். அவர் அப்போது சட்டம் மற்றும் ஒழுங்குக்கு பொறுப்பான அமைச்சராக இருந்தார், எனவே அவர் அதிகாரிகள் மீது சுமையை அறிந்திருப்பதாகக் கூறினார்.
இந்த விவகாரத்தில் உரையாற்றிய எதிர்க்கட்சியின் தலைமைச் செயலாளர் லக்ஷ்மன் கிரியெல்ல, சபாநாயகர், நாடாளுமன்ற உறுப்பினர்களின் உரிமைகளைப் பாதுகாப்பவர் என்பதால், கைதுக்கான காரணங்களைக் கோரி எழுத்துப்பூர்வ கோரிக்கையை முன்வைக்க வேண்டிய பொறுப்பு உள்ளது என்று கூறினார். பதியுதீன் குற்றச்சாட்டு இல்லாமல் தடுத்து வைக்கப்பட்டுள்ளதாகவும், பிரிட்டிஷ் நிலை ஆணைகளில் குறிப்பிடப்பட்டுள்ள நடைமுறைக்கு ஏற்ப இதி தொடர்பில் சபாநாயகர் அறிந்திருக்க வேண்டும் என்பது இங்கும் பொருந்தும் என்றும் அவர் சுட்டிக்காட்டினார்.
இதற்கு, பாராளுமன்ற சபாநாயகர் மஹிந்த யாப்பா அபேவர்தன காரணங்களுக்காக கோரிக்கை விடுத்ததாகக் கூறினார், ஆனால் கேள்விக்கு வேறு எந்த விதத்திலும் பொறுப்பேற்று பதிலளிக்கவில்லை என்பதும் குறிப்பிடத்தக்கது.
- ஆர்.ரிஷ்மா
