ஜனாதிபதி அநுர குமார திசாநாயக்க இன்று (10) ஐக்கிய அரபு இராச்சியத்திற்கு உத்தியோகபூர்வ விஜயம் மேற்கொள்ள உள்ளார்.
நாட்டின் ஜனாதிபதி முகமது பின் சயீத் அல் நஹ்யானின் (Mohamed bin Zayed Al Nahyan) அழைப்பின் பேரில் ஜனாதிபதி இந்த விஜயத்தை மேற்கொள்ள உள்ளதாக வெளியுறவு அமைச்சகம் தெரிவித்துள்ளது.
இந்த விஜயத்தின் போது, ஜனாதிபதி அநுர குமார திசாநாயக்க 2025 உலக அரசாங்க உச்சி மாநாட்டில் கலந்து கொள்ளவுள்ளார், மேலும் உச்சிமாநாட்டில் உரையாற்றவும் திட்டமிடப்பட்டுள்ளது.
ஜனாதிபதி, ஐக்கிய அரபு இராச்சியத்தின் ஜனாதிபதி ஷேக் முகமது பின் சயீத் அல் நஹ்யானுடன் இருதரப்பு பேச்சுவார்த்தைகளில் ஈடுபட உள்ளதாகவும், நாட்டின் துணை ஜனாதிபதியும் பிரதமருமான ஷேக் முகமது பின் ரஷீத் அல் மக்தூமையும் சந்திக்க உள்ளதாகவும் வெளியுறவு அமைச்சகம் தெரிவித்துள்ளது.
உலக அரசாங்க உச்சி மாநாட்டில் பங்கேற்கும் பல நாடுகளின் அரச தலைவர்கள் மற்றும் அரசாங்கத் தலைவர்களுடன் ஜனாதிபதி அநுர குமார திசாநாயக்க இருதரப்பு கலந்துரையாடல்களை நடத்த உள்ளார்.
இந்த விஜயத்தின் போது, இலங்கையில் முதலீட்டு வாய்ப்புகள் குறித்து தகவல் தொழில்நுட்பம், செயற்கை நுண்ணறிவு, எரிசக்தி, சுற்றுலா, நிதி மற்றும் ஊடகத் துறைகளில் முன்னணி உலகளாவிய நிறுவனங்களின் தலைமை நிர்வாக அதிகாரிகளுடன் ஜனாதிபதி கலந்துரையாடவுள்ளதாகவும் வெளியுறவு அமைச்சகம் மேலும் தெரிவித்துள்ளது.